يا نور قايد برغم العتمة
ليه بتخافي من روحك؟!
و ليه بتداري في روحك؟!
و ليه بتخبي أحلامك ورا طموحك؟!!
و ليه بتقدسي رهبة
بتتشكل
في كل بداية ونهاية
و كل وداع
سلاسل خوف على بابك؟!
و ليه بتدنسي رغبة
بتتوضى في نهر الحب
و تصلي في محرابك؟!
و ليه يا حوا بتسايري خطا الأموات
و ناسية خطوة العايشين؟!
و ليه بتغلفي حسنك بورق التين؟!!
أنا آدم!
رهنت الجنة للشياطين ..
و كان الرهن حبة شوف!!
سيبيني أشوف
سواد شعرك
سيبيني أطوف
جنان أرضك!
و تقطف إيدي تفاحك
و تسقيني ينابيعك
يزيد عطشي
و أدوب و أسكر..
و أتوه من سكري جواكي
لحد ما افوق..
يجيبني الشوق
و أرهن جنتي تاني
بحبة شوف!!
ليست هناك تعليقات:
إرسال تعليق